26.02.2011 Был аҙнала беҙҙе...
Хайран итте...
Шотландияның Локерби ҡалаһы өҫтөнән «Лондон – Нью-Йорк» рейсы буйынса осҡан самолетты шартлатыуға Ливия лидеры Муаммар Каддафи бойороҡ биргән була. 1988 йылда булған авиаһәләкәттә 270 кешенең ғүмере өҙөлгәйне. Был хаҡта Ливияның элекке юстиция министры Мостафа Әбел- Джәлих белдергән.
ҡайғыға һалды...
Яңы Зеландияның Премьер-министры, ер тетрәү сәбәпле, илдә ғәҙәттән тыш хәл иғлан итте. Һуңғы мәғлүмәттәр буйынса, емереклектәр аҫтында ҡалып, 75 кеше һәләк булған, 300 кеше хәбәрһеҙ юғалған. 80 йыл эсендә Яңы Зеландияның Көньяҡ утрауында был – иң көслө ер тетрәү.
һөйөндөрҙө...
Премьер-министр Владимир Путин 2012 йылда Рәсәй хәрбиҙәренең пенсияһы 1,5 тапҡырға артасағы хаҡында белдергән. Шулай уҡ киләһе йылдан уларҙың эш хаҡы ла һиҙелерлек артасаҡ.
Аптыратты...
Рәсәйҙә сығарылған тәмәке ҡаптарына уның ағыулы булыуы һәм тәмәке тартыуҙың ниндәй һөҙөмтәләргә килтереүе тураһында һүрәттәр баҫыласаҡ. Сөнки илебеҙ тәмәке тартыусылар һаны буйынса донъяла лидерҙар рәтендә. Беҙҙә 44 миллион кеше даими рәүештә көйрәтә.
Уйланырға мәжбүр итте...
«Левада-үҙәк» социологтары РФ Эске эштәр министрлығындағы реформаларға ҡарата граждандарҙың ниндәй ҡарашта булыуын асыҡлау өсөн һорау алыуҙар үткәргән. Халыҡтың өстән ике өлөшө (65 проценты) милицияның полиция тип үҙгәртелеүенә кире ҡарашта булыуын белдергән, 18 проценты ғына реформаларҙы хуплай.
Өмөт уятты...
Мәскәү метроһында йөрөйәсәк яңы поездар электрон ҡорамалдар менән йыһазландырыласаҡ. Пассажирҙар баш ҡала маршруттары менән танышып барһын өсөн экрандар, хәүефһеҙлек камералары ҡуйыласаҡ.
Оҡшаш яңылыҡтар
