08.04.2017 Хажға барырға теләһәң…
Башҡортостан мосолмандары диниә назаратында хаж бүлеге ойошторолдо. Мосолмандар өсөн фарыз ғәмәлде үтәргә теләүселәр Сәғүд Ғәрәбстанына “Урал-сервис” фирмаһы аша бара ала. Улар ошоғаса хажға “Мөслим тур”, “Хадж фонд”, “ЦДУМ РТ хадж” фирмалары аша йөрөй ине. “Хаж” буйынса берҙәм операторҙы һайлау ойоштороу эштәрен еңеләйтә. Башҡортостан мосолмандары диниә назараты хаж ҡылыусы менән уны ойоштороусы араһында гарант булып тора”, – ти хажға барыуҙы ойоштороусыларҙың береһе Илшат Хафизов. Мөхәммәт бәйғәмбәрҙең тыуған иленә изге ғәмәлде үтәргә барыусыларға “эконом” һәм “стандарт” программалары тәҡдим ителә. Уларҙың тәүгеһендә Өфөнән тура Дубайға осоу һәм ике көн автобуста барыу ҡаралған. Хаҡы – 105 мең һум. Икенсеһе – самолет менән тура осоу, бөтә уңайлыҡтар булдырылған. Хаҡы – 150 мең һум. Сәфәр ҡылыусыларҙы табип оҙатып йөрөй. “Урал-сервис” аша хаж ҡылырға теләүселәр урындағы имамдарға ғариза менән мөрәжәғәт итә ала. Быйыл хажға барыуға Рәсәйгә 20 мең мосолманға квота бүленгән. Алланың әмерен үтәүселәргә назаратта дәрестәр ҙә биреләсәк.
“Раббыбыҙ һәр мосолманға хәленән килгәнсә хаж ҡылыуҙы әмер иткән. Әҙәм балаһының ҡәлебе – хажда. Сәғүд Ғәрәбстанында саңлы, түҙеп торғоһоҙ эҫе. Ләкин барыбер кеше шунда ҡабат-ҡабат барырға атлығып тора. Хажы ҡабул булған кеше сабый балалай гонаһһыҙ ҡайта. Хажға күберәк ололар йөрөй. Хатта 90 йәшлек ҡарттар ҙа бар. Йәштәрҙе лә был ғәмәлде үтәргә саҡырам. Хажға ышаныслы ойошмалар аша барырға кәрәк”, – ти Илшат хажи Хафизов.